ന്യൂഡല്‍ഹി: ഓണ്‍ലൈന്‍ ബാങ്കിങ് ആപ്പായ പേ ടിഎം വഴി ഇനി മുതല്‍ കൊവിഡ് വാക്‌സിന്‍ ബുക്ക് ചെയ്യാം. വാക്സിന്‍ ലഭ്യത പരിശോധിക്കനും വാക്‌സിന്‍ ബുക്ക് ചെയ്യാനും ആപ്പ് ഉപയോഗിക്കാമെന്ന് കമ്പനി വ്യക്തമാക്കി.

കൊവാക്‌സിന്‍, കൊവിഷീല്‍ഡ് വാക്‌സിനുകള്‍ ബുക്ക് ചെയ്യാന്‍ സാധിക്കുമെന്ന് കമ്പനി അറിയിച്ചു. സ്വകാര്യ ആപ്പുകള്‍ വഴി വാക്‌സിന്‍ ബുക്ക് ചെയ്യാന്‍ സൗകര്യം ഒരുക്കുമെന്ന് മുന്‍പ് കേന്ദ്രം അറിയിച്ചിരുന്നു. ഉപയോക്താക്കള്‍ക്ക് അവരുടെ നമ്പര്‍ ഉപയോഗിച്ച് രജിസ്റ്റര്‍ ചെയ്യാം. കൂടാതെ പിന്‍കോഡ് അല്ലെഹ്കില്‍ ജില്ല അടിസ്ഥാനത്തില്‍ വാക്‌സിന്‍ കേന്ദ്രങ്ങള്‍ കണ്ടെത്താന്‍ സാധിക്കും. കോവിന്‍ ആപ്പ് വഴിയും ബുക്കിംഗ് തുടരും.
Sources:globalindiannews

ബാള്‍ട്ടിമൂര്‍: നിര്‍മാണത്തിലെ പാകപ്പിഴ മൂലം ആറു കോടി ഡോസ് ജോൺസൺ ആൻ്റ് ജോൺസൺ കൊവിഡ് 19 വാക്സിൻ നശിപ്പിച്ചതായി റിപ്പോര്‍ട്ട്. യുഎസ് നഗരമായ ബാള്‍ട്ടിമൂറിൽ ഉത്പാദിപ്പിച്ച കൊവിഡ് 19 വാക്സിനാണ് നിര്‍മാണത്തിൽ പാളിച്ചയുണ്ടായെന്ന സംശയത്തെ തുടര്‍ന്ന് നശിപ്പിച്ചതെന്നാണ് റിപ്പോര്‍ട്ടുകള്‍. എമര്‍ജൻ്റ് ബയോസൊല്യൂഷൻസ് ഫാക്ടറി എന്ന നിര്‍മാണശാലയിൽ ഉത്പാദിപ്പിച്ച വാക്സിനാണ് നശിപ്പിച്ചത്.

ഈ നിര്‍മാണകേന്ദ്രത്തിൽ ഉത്പാദിപ്പിച്ച വാക്സിനിൽ ഒരു ചേരുവ കൂടിപ്പോയതിൻ്റെ പേരിൽ ഏപ്രിലിലും ഒന്നരക്കോടി ഡോസ് വാക്സിൻ നശിപ്പിച്ചിരുന്നു. ഇതേത്തുടര്‍ന്ന് ഫാക്ടറിയിലെ പ്രവര്‍ത്തനങ്ങള്‍ നിര്‍ത്തിവെക്കുകയും ചെയ്തിരുന്നു. ഇതിനു രണ്ട് മാസങ്ങള്‍ക്ക് ശേഷമാണ് സമാനമായ സംഭവം ആവര്‍ത്തിക്കുന്നത്. ഒറ്റ ഡോസ് മാത്രം ഉപയോഗിക്കേണ്ട ജോൺസൺ ആൻ്റ് ജോൺസൺ വാക്സിൻ്റെ 10 കോടിയോളം ഡോസ് നിലവിൽ ഈ കേന്ദ്രത്തിൽ മാറ്റി വെച്ചിട്ടുണ്ടെന്നാണ് അസോസിയേറ്റഡ് പ്രസ് റിപ്പോര്‍ട്ട്. ഇതിനു പുറമെ ഫൈസര്‍ വാക്സിനും ഇവിടെ ഉത്പാദിപ്പിക്കുന്നുണ്ട്.

നിലവിൽ ഈ സ്ഥാപനത്തിൽ നിന്ന് ഉത്പാദിപ്പിച്ച ഒരു കോടി ഡോസ് വാക്സിനു മാത്രമാണ് യുഎസിലെ ഫുഡ് ആൻ്റ് ഡ്രഗ് അഡ്മിനിസ്ട്രേഷൻ വിതരണത്തിന് അനുമതി കൊടുത്തിട്ടുള്ളത്. ബാക്കി ബാച്ചുകളുടെ കാര്യം പിന്നീട് അറിയിക്കാമെന്നാണ് വ്യക്തമാക്കിയിട്ടുള്ളത്. എന്നാൽ ഇവിടെ ഉത്പാദിപ്പിച്ച പല ബാച്ചുകള്‍ക്കും വേണ്ടത്ര ഗുണനിലവാരമില്ലെന്ന് എഫ്ഡിഎ അധികതര്‍ വ്യക്താക്കിയിട്ടുണ്ട്. ഇത് ആറു കോടി ഡോസോളം വരുമെന്നാണ് ന്യൂയോര്‍ക്ക് ടൈംസ് റിപ്പോര്‍ട്ട്. വൃത്തിയില്ലാത്ത അന്തരീക്ഷത്തിൽ വേണ്ടത്ര പരിശീലനമില്ലാത്ത ജീവനക്കാരാണ് വാക്സിൻ നിര്‍മാണത്തിൽ ഏര്‍പ്പെട്ടിരുന്നതെന്നും ഇൻസ്പെക്ടര്‍മാര്‍ വ്യക്തമാക്കി. പരിശോധനയ്ക്കു ശേഷം മാത്രമേ ഇവിടെ ഉത്പാദിപ്പിച്ച വാക്സിന് വിതരണാനുമതി നല്‍കുന്ന കാര്യം പരിഗണിക്കൂ എന്നു ഉദ്യോഗസ്ഥര്‍ വ്യക്തമാക്കി. കൂടാതെ വാക്സനു അനുമതി നല്‍കിയാലും കമ്പനി ഗുണനിലവാര മാര്‍ഗനിര്‍ദേശങ്ങള്‍ പാലിച്ചിട്ടില്ലെന്ന മുന്നറിയിപ്പ് വാക്സിൻ കുപ്പികളിൽ രേഖപ്പെടുത്തുമെന്നും ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തിട്ടുണ്ട്.