കേരളത്തിലെ സ്വകാര്യ ടൂറിസ്റ്റ്ബസുകളിൽ നിയമാനുസൃതമല്ലാത്ത അലങ്കാരങ്ങൾ അനുവദിക്കരുതെന്ന് ഹൈക്കോടതിയുടെ ഉത്തരവ്. നിയമപ്രകാരമല്ലാത്ത ലൈറ്റുകൾ, അതി തീവ്ര ശബ്ദസംവിധാനം, വശങ്ങളിൽ ചിത്രങ്ങൾ തുടങ്ങിയ അലങ്കാരങ്ങൾ ബസ്സുകളിൽ വെയ്ക്കുന്നതിനാണ് കോടതിയുടെ വിലക്ക്. അതിനാൽ സ്വകാര്യ ടൂറിസ്റ്റ് ബസ്സുകൾ മോട്ടോർ വാഹനനിയമങ്ങൾ കർശനമായി പാലിക്കുന്നുണ്ടെന്ന ട്രാൻസ്പോർട്ട് കമ്മിഷണർ ഉറപ്പാക്കണമെന്ന് ജസ്റ്റിസ് അനിൽ കെ. നരേന്ദ്രൻ നിർദേശിച്ചു. വിനോദയാത്രയ്ക്കും മറ്റും വാടകയ്ക്ക് ഓടുന്ന ബസുകളുൾപ്പെടെയുള്ള സ്വകാര്യബസുടമകൾ നൽകിയ ഹർജിയിലാണ് കോടതി ഉത്തരവ്.

ഇനിമുതൽ ബസ്സുകളിൽ അമിതപ്രകാശമുള്ള ബഹുവർണ എൽ.ഇ.ഡി ലൈറ്റുകൾ ഘടിപ്പിക്കാൻ പാടില്ല. മോട്ടോർ വാഹനനിയമം അനുശാസിക്കുന്ന ഇൻഡിക്കേറ്റർ, റിഫ്ലക്ടർ മാത്രം വാഹനങ്ങളിൽ വയ്ക്കുക. മൾട്ടിപ്പിൾ പവർ ആംപ്ലിഫയർ, സ്പീക്കറുകൾ തുടങ്ങിയ അതി തീവ്രമായ ശബ്ദസംവിധാനങ്ങൾ വയ്ക്കുന്നതിനും നിയന്ത്രണമുണ്ടാകും. വാഹനത്തിന്റെ വലുപ്പം അനുസരിച്ച് ഓഡിയോ സംവിധാനം മാത്രം സജ്ജീകരിക്കാനാണ് കോടതി നിർദ്ദേശം. വാഹനത്തിന്റെ ഇരു വശങ്ങളിലെയും ചില്ലുകളിൽ ചിത്രങ്ങൾ വയ്ക്കുന്നതോ ഫിലിം ഒട്ടിക്കുന്നതോ കർട്ടൺ ഇടുന്നതോ അനുവദനീയമല്ല. വാഹനത്തിന്റെ വശങ്ങളിൽ വരച്ചിടുന്ന ചിത്രങ്ങൾ കർശനമായും നീക്കം ചെയ്യണം. കൂടാതെ വാഹനത്തിന് പുറത്ത് ഉടമയുടെ പേര്, വിലാസം എന്നിവ ചേർക്കുകയും വേണം. വശങ്ങളിലെ ചിത്രങ്ങൾ മറ്റുവാഹനങ്ങളിലെ ഡ്രൈവർമാരുടെ ശ്രദ്ധ തിരിക്കുമെന്നാണ് ഹൈക്കോടതിയുടെ നിരീക്ഷണം. ബസ്സിനുപുറത്ത് ലൈറ്റുകളും എൽ.ഇ.ഡി.സ്ട്രിപ്പുകളും പിടിപ്പിക്കുന്നത് മറ്റു വാഹനങ്ങൾക്ക് ബുദ്ധിമുട്ടുണ്ടാക്കുമെന്നും കോടതി ചൂണ്ടിക്കാട്ടി.

നിയമാനുസൃതമല്ലാത്ത രീതിയില് ബസ്സുകളിൽ ഘടിപ്പിച്ചിട്ടുള്ളവ നീക്കുന്നതിനായി മോട്ടോർവാഹന വകുപ്പ് നൽകിയ നോട്ടീസ് ചോദ്യംചെയ്തുള്ള ഹർജികളും കോടതി തീർപ്പാക്കി. അനധികൃതമായി വാഹനങ്ങളിൽ ഘടിപ്പിച്ചിട്ടുള്ളവ നീക്കി ബസ് പരിശോധനയ്ക്ക് ഹാജരാക്കാനാണ് മോട്ടോർ വാഹന വകുപ്പിന്റെ നോട്ടീസെന്ന് കോടതി വ്യക്തമാക്കി. ഇനിയുള്ള പരിശോധനയിൽ നിയമലംഘനം നടന്നെന്ന് കണ്ടാൽ മാത്രമേ ഫിറ്റ്നസ് സർട്ടിഫിക്കറ്റ് റദ്ദാക്കാനുള്ള നടപടി ആരംഭിക്കൂ. പരിശോധനയ്ക്കെത്തുന്ന വാഹനങ്ങളിൽ ചെറിയ രീതിയിലുള്ള നിയമലംഘനം കണ്ടാൽ അവ പരിഹരിക്കാൻ ന്യായമായ സമയം നൽകണമെന്നും ഹൈക്കോടതി നിർദേശിച്ചു.