ന്യൂയോ‍ർക്ക്: ചന്ദ്രനിൽ ഇന്ത്യ സോഫ്റ്റ്ലാൻഡിങ് നടത്തിയതിൻ്റെ അത്ഭുതത്തിലും അതിശയത്തിലുമാണ് ലോകം. ചന്ദ്രയാൻ ലാൻഡർ ഇറങ്ങിയ ചന്ദ്രനിലെ ദക്ഷിണധ്രുവത്തിലെ പോയിൻ്റിന് ശിവശക്തി പോയിൻ്റ് എന്ന് ഇന്ത്യ പേര് നൽകുകയും ചെയ്തു. ശാസ്ത്രീയനേട്ടം ആഘോഷിക്കപ്പെടുന്ന വേളയിൽ മതവിശ്വാസവുമായി ബന്ധമുള്ള പേര് നൽകിയ പ്രധാനമന്ത്രി നരേന്ദ്ര മോദിയുടെ നടപടി ഏറെ ച‍ർച്ചയാകുകയും ചെയ്തിരുന്നു. എന്നാൽ ചന്ദ്രനിലെ മണ്ണിൽ കുർബാന ചൊല്ലിയ പാരമ്പര്യമാണ് യുഎസ് ബഹിരാകാശ സഞ്ചാരിയും ഗവേഷകനുമായ എഡ്വിൻ ബസ് ആൽഡ്രിനുള്ളത്. ഏറെക്കാലം നാസ അധികം ച‍ർച്ചയാക്കാതെ മറച്ചുവെച്ച ഇക്കാര്യം വർഷങ്ങൾക്കുശേഷമാണ് മാധ്യമങ്ങളിലൂടെ പുറത്തുവന്നത്.

അപ്പോളോ11 ദൗത്യത്തിൻ്റെ ഭാഗമായി ഈഗിൾ മൊഡ്യൂളിൽ ചന്ദ്രനിലിറങ്ങിയ ആൽഡ്രിൻ ചന്ദ്രനിൽ കാലുകുത്തുന്ന രണ്ടാമത്തെ മനുഷ്യനാണ്. ചന്ദ്രനിലെത്തുന്ന ആദ്യ ബഹിരാകാശ സ‍ഞ്ചാരിയായ നീൽ ആംസ്ട്രോങ്ങിനൊപ്പമായിരുന്നു ബസ് ആൽഡ്രിൻ എന്ന എഡ്വിൻ ആൽഡ്രിൻ്റെയും യാത്ര. ചന്ദ്രനിലെ പ്രശാന്തതയുടെ സമുദ്രത്തിൽ സുരക്ഷിതമായി ലാൻഡ് ചെയ്ത ഈഗിൾ പേടകത്തിൽനിന്ന് ആദ്യം പുറത്തിറങ്ങിയത് നീൽ ആംസ്ട്രോങ്ങായിരുന്നു. മിനിറ്റുകൾക്കു ശേഷം ആൽഡ്രിനും പുറത്തിറങ്ങി. ചന്ദ്രനിൽനിന്ന് ടെലിഫോൺ വഴി യുഎസ് പ്രസിഡൻ്റ് ജോൺ എഫ് കെന്നഡിയുമായി സംസാരിച്ച സംഘം തികഞ്ഞ ആവേശത്തിലായിരുന്നു. മനുഷ്യൻ ആദ്യമായി ചന്ദ്രനിൽ കാലുകുത്തിയെന്ന റെക്കോഡ് സ്വന്താമക്കിയതിൻ്റെ അഭിമാനത്തിലായിരുന്നു അമേരിക്കക്കാരും. യുഎസ് പതാകയും ഫലകവും സ്ഥാപിക്കുന്നതടക്കം നിരവധി ജോലികളാണ് സംഘത്തിനുണ്ടായിരുന്നത്. എന്നാൽ ഇതിനിടെ എഡ്വിൻ ആൽഡ്രിൻ അന്നാരും ധൈര്യപ്പെടാതിരുന്ന ഒരു കാര്യത്തിന് സമയം കണ്ടെത്തി. ചന്ദ്രനിലെ മണ്ണിൽ ക്രൈസ്തവരീതിയിൽ കുർബാന അർപ്പിക്കുക. ഇതിനായി അപ്പവും വീഞ്ഞും ആൽഡ്രിൻ തയ്യാറാക്കി കൊണ്ടുവരികയും ചെയ്തിരുന്നു.

ക്രിസ്ത്യാനികളെ സംബന്ധിച്ചിടത്തോളം വിശ്വാസജീവിതത്തിലെ ഒഴിച്ചുകൂടാനാകാത്ത ഘടകമാണ് കുർബാന എന്ന ചടങ്ങ്. ആൽഡ്രിനാകട്ടെ, വെറും വിശ്വാസിയല്ല, വെബ്സ്റ്റർ പ്രിസ്ബിറ്റീരിയൻ സഭയിലെ ഒരു വൈദികനായിരുന്നു. ബഹിരാകാശത്തേക്ക് പുറപ്പെടുന്നതിനു മുൻപു തന്നെ കൈയ്യിൽ അപ്പവും വീഞ്ഞും സൂക്ഷിക്കാനും ചന്ദ്രനിൽവെച്ചു കുർബാന അർപ്പിക്കാനും ആൽഡ്രിൻ അനുമതി തേടിയിരുന്നു. ബഹിരാകാശത്തുവെച്ച് പ്രാർഥിക്കുന്നതൊന്നും മുൻപും പുതുമയായിരുന്നില്ല. എന്നാൽ, സാധാരണ പള്ളികളിൽ ഒരുകൂട്ടം വിശ്വാസികളോടൊപ്പം നടത്തുന്ന വിപുലമായ കുർബാന ഒറ്റയ്ക്ക് ചന്ദ്രനിൽവെച്ചു നടത്തുക എന്നത് ചിന്തിക്കാവുന്നതിലും അപ്പുറമായിരുന്നു. മണിക്കൂറുകൾ നീണ്ട ബഹിരാകാശയാത്രയ്ക്കു ശേഷം സഞ്ചാരികൾക്ക് വിശ്രമിക്കാനായി അനുവദിച്ച സമയത്തായിരുന്നു ആൽഡ്രിൻ കുർബാനയ്ക്കുള്ള ഒരുക്കങ്ങൾ പൂർത്തിയാക്കിയത്.

“മൂന്നുലക്ഷമോ നാലുലക്ഷമോ വരുന്ന ആളുകളുടെ പത്തുവർഷത്തോളം നീണ്ട ജോലിയുടെ പരിസമാപ്തിയാണ് ഇതെന്ന് എനിക്ക് അറിയാമായിരുന്നു. ഇതിൻ്റെ ഫലം എന്തായാലും അത് രാജ്യത്തിൻ്റെ പ്രതിച്ഛായയെ ബാധിക്കും.” പിൽക്കാലത്ത് ആൽഡ്രിൻ സംഭവത്തെപ്പറ്റി വിവരിക്കുമ്പോൾ നീൽ ആംസ്ട്രോങ് പറഞ്ഞു. ദൗത്യത്തിൻ്റെ അടുത്ത ഘട്ടത്തിലേക്ക് കടക്കുന്നതിനു മുൻപായിരുന്നു ഭൂമിയിലെ ഗ്രൗണ്ട് ക്രൂവിനോട് സംസാരിച്ച് ആൽഡ്രിൻ കുർബാനയുടെ കാര്യം വ്യക്തമാക്കിയത്. “കുറച്ചു സമയം നിശബ്ദരായിരിക്കണം. ഇത് കേൾക്കുന്ന എല്ലാവരും ശ്രദ്ധിക്കുക. കഴിഞ്ഞ ഏതാനും മണിക്കൂറുകളായി നടക്കുന്ന കാര്യങ്ങൾക്ക് നിങ്ങൾക്ക് നിങ്ങളുടേതായ രീതിയിൽ നന്ദി പറയാം.” തുടർന്ന് ബഹിരാകാശത്ത് എത്തിച്ച അപ്പവും വീഞ്ഞും പുറത്തെടുത്ത ആൽഡ്രിൻ അവ കാസയിലേക്ക് പകർന്നു. കുർബാനയ്ക്കായി സഭ നൽകിയ പ്രത്യേക കാസയായിരുന്നു അത്. ഭൂമിയുടെ ആറിലൊന്നോളം മാത്രം ഗുരുത്വബലമുള്ള ചന്ദ്രനിൽ വീഞ്ഞ് സാവധാനം കാസയുടെ വക്കിലൂടെ ഉള്ളിലേക്ക് പടർന്നിറങ്ങി എന്നാണ് ആൽഡ്രിൻ ഓർമിക്കുന്നത്. തുടർന്ന് ഏതാനും ബൈബിൾ ഭാഗങ്ങൾ ഉച്ഛരിച്ച ശേഷം വാഴ്ത്തി വിഭജിച്ച അപ്പവും വീഞ്ഞും ആൽഡ്രിൻ തന്നെ ഭക്ഷിച്ചു. എന്നാൽ, പറയത്തക്ക ദൈവവിശ്വാസമൊന്നും ഇല്ലാതിരുന്ന നീൽ ആംസ്ട്രോങ് കുർബാനയിൽ പങ്കെടുക്കാതെ നിശബ്ദനായി മാറിനിന്നു.

ചന്ദ്രനിൽ താൻ അർപ്പിച്ച വിശുദ്ധ കുർബാന ലോകമെങ്ങും സംപ്രേക്ഷണം ചെയ്യണമെന്നായിരുന്നു ആൽഡ്രിൻ ആഗ്രഹിച്ചിരുന്നത്. എന്നാൽ സർക്കാർ ഫണ്ട് ഉപയോഗിച്ചു നടത്തുന്ന ശാസ്ത്രീയപരീക്ഷണങ്ങളിൽ മതവിശ്വാസം കൂട്ടിച്ചേർക്കുന്നതിനെ യുഎസിൽ തന്നെ ഒരുവിഭാഗം എതിർത്തിരുന്നു. മാസങ്ങൾക്കു മുൻപ് അപ്പോളോ 8 ദൗത്യത്തിൻ്റെ ഭാഗമായി ഭ്രമണപഥത്തിലെത്തിയ ബഹിരാകാശ സഞ്ചാരികൾ ബൈബിൾ വായിച്ചത് വലിയ വിവാദമാകുകയും ചെയ്തിരുന്നു. ഈ സാഹചര്യത്തിൽ ആൽഡ്രിൻ്റെ ചന്ദ്രനിലെ കുർബാനയ്ക്ക് അധികം പ്രചാരം നൽകേണ്ടെന്ന നിലപാടായിരുന്നു യുഎസിനും. ആൽഡ്രിനു കുർബാന ചൊല്ലാൻ അനുമതി നൽകിയെങ്കിലും ഉപയോഗിക്കുന്ന വാക്കുകൾക്ക് പൊതുസ്വഭാവം വേണമെന്നായിരുന്നു ഫ്ലൈറ്റ് ക്രൂ ഓപ്പറേഷൻസ് മാനേജറുടെ നിലപാട്. ഈ സാഹചര്യത്തിൽ ചന്ദരനിലെ കുർബാനയെപ്പറ്റി മാധ്യമങ്ങളിലും വാർത്ത വന്നില്ല.

കുർബാന ചടങ്ങ് മൊത്തത്തിൽ ലളിതമാക്കാൻ തീരുമാനിച്ച ആൽഡ്രിൻ വിവാദമൊഴിവാക്കാനായി ലൂണാ‍ർ പേടകത്തിനുള്ളിൽ വെച്ചുതന്നെയാണ് കുർബാന പൂർത്തിയാക്കിയത്. അതായത്, ചന്ദ്രൻ്റെ ഉപരിതലത്തിൽ നിന്നുകൊണ്ടുള്ള കുർബാനയ്ക്കു പകരം ലളിതമായി ഈഗിൾ പേടകത്തിനുള്ളിൽ കുർബാന സംഘടിപ്പിച്ചു.

എന്നാൽ, മനുഷ്യൻ ചന്ദ്രനിൽ കാലുകുത്തി അര നൂറ്റാണ്ട് പിന്നിടുമ്പോൾ ഭൂമിയ്ക്കു വെളിയിലെ മതാനുഷ്ഠാനം അത്ര ഒറ്റപ്പെട്ട സംഭവമല്ല. 1994ൽ എൻഡേവർ സ്പേസ് ഷട്ടിലിൽ ബഹിരാകാശത്ത് എത്തിയ മൂന്ന് സഞ്ചാരികൾ കത്തോലിക്കാ ആചാരപ്രകാരം ബഹിരാകാശത്തുവെച്ച് കുർബാന സ്വീകരിച്ചിരുന്നു. 2003ലെ കൊളംബിയ ദുരന്തത്തിൽ മരിച്ച ജൂതമതക്കാരനായ ബഹിരാകാശ സഞ്ചാരി ഇലൺ റാമോൺ ബഹിരാകാശത്തുവെച്ച് മുൻപ് ജൂതമതപ്രാ‍ർഥന നടത്തിയതും വാ‍ർത്തായിട്ടുണ്ട്. ഇതിൽ നിന്നെല്ലാം ഒരു പടി കൂടി കടന്ന്, റഷ്യൻ സഞ്ചാരിയായ സെ‍ർജി റിസിക്കോവ് റഷ്യൻ ഓർത്തഡോക്സ് സഭയിലെ വിശുദ്ധനായ സെൻ്റ്. സെറാഫിം ഓഫ് സാരോവിൻ്റെ തിരുശേഷിപ്പുമായാണ് 2017ൽ ശൂന്യാകാശത്ത് എത്തിയത്.

അതേസമയം, ചന്ദ്രനിലെ ആൽഡ്രിൻ്റെ കുർബാന ഇന്നും പ്രിസ്ബിറ്റീരിയൻ സഭയിൽ ആഘോഷിക്കപ്പെടുന്നുണ്ട്. വെബ്സ്റ്റ‍ർ പ്രിസ്ബിറ്റീരിയൻ സഭയിൽ ലൂണാ‍ർ കമ്മ്യൂണിയൻ സൺഡേ ഒരു ആഘോഷദിവസമാണ്. പിൽക്കാലത്ത് ആൽഡ്രിൻ തന്നെ പലവട്ടം ഈ സംഭവത്തെപ്പറ്റി സംസാരിക്കുകയും എഴുതുകയും ചെയ്തിട്ടുണ്ടെങ്കിലും ഈ കുർബാനയ്ക്ക് രഹസ്യസ്വഭാവമുണ്ടായിരുന്നു എന്ന കിംവദന്തികൾ സജീവമാണ്. ക്രിസ്ത്യാനികളും ജൂതരും മുസ്ലീങ്ങളും തദ്ദേശമതവിഭാഗക്കാരും നിരീശ്വരവാദികളുമെല്ലാം അടങ്ങുന്ന മനുഷ്യവംശത്തെ പ്രതിനിധീകരിച്ചാണ് താൻ ചന്ദ്രനിൽ കാലുകുത്തിയത് എന്ന് ബസ് ആൽഡ്രിന് നന്നായി അറിയാമായിരുന്നു. എന്നാൽ ഇതിന് ദൈവത്തിന് നന്ദി പറയുക എന്നതാണ് ശരിയായ കാര്യമെന്നു കരുതിയ ആൽഡ്രിൻ അതിനു തെരഞ്ഞെടുത്ത രീതിയായിരുന്നു കുർബാന.

Sources:azchavattomonline

http://theendtimeradio.com