കവിയും ഗാനരചയിതാവും പത്രപ്രവർത്തകനുമായിരുന്ന പഴവിള രമേശൻ അന്തരിച്ചു. 83 വയസായിരുന്നു. ഹൃദയസംബന്ധമായ അസുഖത്തെ തുടർന്ന് ചികിൽസയിലിരിക്കെ തിരുവനന്തപുരത്തെ സ്വകാര്യ ആശുപത്രിയിൽ ആയിരുന്നു അന്ത്യം. സംസ്കാരം നാളെ നടക്കും. കൊല്ലം പെരിനാട് കണ്ടച്ചിറ പഴവിളയില്‍ എന്‍.എ. വേലായുധന്റെയും കെ. ഭാനുക്കുട്ടി അമ്മയുടെയും മകനായി ജനിച്ചു. അഞ്ചാലുംമൂട് പ്രൈമറി സ്‌കൂള്‍, കരിക്കോട് ശിവറാം ഹൈസ്‌കൂള്‍, കൊല്ലം എസ്.എന്‍ കോളേജ്, തിരുവനന്തപുരം യൂണിവേഴ്സിറ്റി കോളേജ് എന്നിവിടങ്ങളിലായിരുന്നു വിദ്യാഭ്യാസം പൂർത്തിയാക്കിയത്. കെ. ബാലകൃഷ്ണന്റെ കൗമുദി ആഴ്ചപ്പതിപ്പില്‍ സഹ പത്രാധിപരായിരുന്നു അദ്ദേഹം. അതിനുശേഷം കേരള ഭാഷാ ഇന്‍സ്റ്റിറ്റ്യൂട്ടായിരുന്നു പ്രവർത്തന തട്ടകം.

ഈ സമയത്തായിരുന്നു എഴുത്തിന്റെ ലോകത്ത് പഴവിള രമേശൻ സജീവമായത്. കവിതയും ലേഖനങ്ങളുമായി നിരവധി കൃതികൾ അദ്ദേഹം രചിച്ചിട്ടുണ്ട്. മഴയുടെ ജാലകം, പഴവിള രമേശന്റെ കവിതകൾ, ഞാനെന്റെ കാടുകളിലേയ്ക്ക്‌ എന്നീ കവിതാ സമാഹാരങ്ങളും ഓർമ്മകളുടെ വർത്തമാനം, മായാത്ത വരകൾ, നേർവര എന്നീ ലേഖനങ്ങളും പഴവിള രമേശന്റെ തൂലികിൽ പിറന്നവയാണ്. മികച്ച സംഘാടകൻ, ഭാഷാപണ്ഡിതൻ എന്നിങ്ങനെ പല മേഖലകളിൽ അദ്ദേഹം പ്രവർത്തിച്ചിട്ടുണ്ട്.

2017-ൽ മലയാള സാഹിത്യ ലോകത്തെ സമഗ്ര സംഭാവനയ്ക്കുള്ള കേരള സാഹിത്യ അക്കാദമി പുരസ്‌കാരം അദ്ദേഹത്തിന് ലഭിച്ചു. കൂടാതെ അബുദാബി ശക്തി അവാര്‍ഡ്, മുലൂര്‍ അവാര്‍ഡ്, ഫിലിം ക്രിട്ടിക്സ് അവാര്‍ഡ് തുടങ്ങി നിരവധി പുരസ്കാരങ്ങളും അദ്ദേഹത്തിന് ലഭിച്ചിട്ടുണ്ട്. പഴവിള രമേശന്റെ നിര്യാണത്തിൽ മുഖ്യമന്ത്രി പിണറായി വിജയൻ ഉൾപ്പെടെയുള്ള രാഷ്ട്രീയ സാംസ്കാരിക മേഖലകളിലുള്ളവർ അനുശോചിച്ചു. പഴവിള രമേശൻ മതനിരപേക്ഷതയുടെയും ആധുനിക കവിതകളുടെയും വക്താക്കളിൽ ഒരാളായിരുന്നുവെന്ന് മുഖ്യമന്ത്രി അനുസ്മരിച്ചു.

പതിനാലാമത്തെ വയസില്‍ നാടകങ്ങള്‍ക്ക് ഗാനം എഴുതിക്കൊണ്ടാണ് അദ്ദേഹം ഗാനരംഗത്ത് എത്തുന്നത്. എങ്കിലും ഒരു ചലച്ചിത്ര ഗാനരചയിതാവ് എന്ന നിലയിലാണ് അദ്ദേഹം ഏറെ പ്രശസ്തനായത്. കൊടിയേറ്റം ഗോപി സംവിധാനം ചെയ്ത ‘ഞാറ്റടി’ എന്ന ചിത്രത്തിലാണ് രമേശന്‍ ആദ്യമായി പാട്ടെഴുതിയത്. അദ്ദേഹം എഴുതിയ ‘അഗ്‌നിയാവണമെനിക്കാളിക്കത്തണം’ എന്ന കവിതയാണ് ഈ ചിത്രത്തിൽ ഉൾപ്പെടുത്തിയത്. എന്നാൽ നിർഭാഗ്യവശാൽ ഈ ചിത്രം സയത്ത് റിലീസായില്ല.

1990-ല്‍ മാളൂട്ടി എന്ന ചിത്രത്തിലെ ‘സ്വര്‍ഗ്ഗങ്ങള്‍ സ്വപ്‌നം കാണും’, ‘മൗനത്തിന്‍ ഇടനാഴിയില്‍’ എന്നീ സൂപ്പർ ഹിറ്റ് ഗാനങ്ങള്‍ രചിച്ചത് പഴവിള രമേശനാണ്. ജോണ്‍സണ്‍ സംഗീതം നിര്‍വ്വഹിച്ച ഗാനങ്ങള്‍ ജി. വേണിഗോപാല്‍, സുജാത, കെ.എസ് ചിത്ര എന്നിവരാണ് പാടിയത്. 1991-ല്‍ റിലീസ് ചെയ്ത മോഹൻലാൽ അഭിനയിച്ച ‘അങ്കിള്‍ബണ്‍’ എന്ന ചിത്രത്തിലെ ‘കുരുക്കുത്തിക്കണ്ണുള്ള’, ‘അമ്പിളിക്കലയൊരു’ എന്നീ ഗാനങ്ങളും പഴവിളയുടെ സൃഷ്ടികളാണ്. രവിന്ദ്രന്‍ സംഗീതം നിര്‍വ്വഹിച്ച ഗാനങ്ങള്‍ കെ.ജെ യേശുദാസ്, കെ.എസ് ചിത്ര എന്നിവരാണ് ആലപിച്ചത്.1994-ല്‍ പുറത്തിറങ്ങിയ ശ്രാദ്ധം എന്ന ചിത്രത്തില്‍ അദ്ദേഹം അഭിനയിക്കുകയും ചെയ്തു.

പഴവിള രണേശൻ ഗാനരചന നിര്‍വഹിച്ച ചിത്രങ്ങള്‍

ചിത്രം: ഞാറ്റടി 

ഗാനം: അഗ്‌നിയാവണമെനിക്കാളിക്കത്തണം (കവിത), സംഗീതം: കാവാലം പദ്മനാഭന്‍, പാടിയത്: യേശുദാസ്

ചിത്രം: ആശംസകളോടെ 
ഗാനം: ശ്രുതി മധുരം, സംഗീതം: രവീന്ദ്രൻ, പാടിയത്: യേശുദാസ്

ചിത്രം: മാളൂട്ടി 
ഗാനം: മൗനത്തിന്‍ ഇടനാഴിയില്‍, സംഗീതം: ജോണ്‍സണ്‍, പാടിയത്: യേശുദാസ്, സുജാത
ഗാനം: സ്വര്‍ഗങ്ങള്‍ സ്വപ്നം കാണും, സംഗീതം: ജോണ്‍സണ്‍, പാടിയത്: വേണുഗോപാല്‍, സുജാത

ചിത്രം: അങ്കിൾ ബൺ 
ഗാനം: അമ്പിളിക്കലയൊരു നൊമ്പരപ്പാടോ, സംഗീതം: രവീന്ദ്രന്‍, പാടിയത്: യേശുദാസ്
ഗാനം: ഇടയരാഗ രമണ ദുഃഖം, സംഗീതം: രവീന്ദ്രന്‍, പാടിയത്: യേശുദാസ്,ചിത്ര
ഗാനം: കുരുക്കുത്തിക്കണ്ണുള്ള, സംഗീതം: രവീന്ദ്രന്‍, പാടിയത്: യേശുദാസ്
ഗാനം: ഡോണ്ട് ഡ്രൈവ് മി മാഡ്, സംഗീതം: രവീന്ദ്രന്‍, പാടിയത്: യേശുദാസ്, മാല്‍ഗുഡി ശുഭ